Kontroll av gjerde.

Det er ein del fokus på gjerdehald for tida. Dette fordi dårlege og gamle gjerde ofte er farlege både for tamme og ville dyr. Fjellstyret har difor bestemt at det i løpet av 2021 vil bli ein kontroll av gjerde rundt alle setrer, dyrkingsparsellar og inngjerda beite i Langmorkje og Nordherad statsallmenningar. Dette vil bli utført av fjellstyret sine tilsette. Gjerdehald som ikkje er i tråd med regelverket (dyrevelferdslova), vil bli rapportert til Statskog, som gjev festaren påbod om å reparere eller å rydde opp. Mattilsynet kan bli kopla inn dersom påbod ikkje blir etterkome.

 Mattilsynet gjennomførte ein kontroll av gjerde på Heimfjellet over to dagar sommaren 2019, der både kommunen v/landbrukskontoret og fjellstyret v/fjelloppsynet var representert. Påbod den gongen vart sendt direkte frå Mattilsynet. Mange av påboda gjaldt bruk av piggtråd. Mattilsynet skal også ta ein kontroll i Langmorkje ein dag nå på forsommaren. Døme på forhold som blir følgd opp etter kontroll er gjerde som ligg/er klemt ned, lause gjerde, dobbeltgjerde, piggtråd åleine, laus piggtråd/topptråd, «attgløymde» strømgjerde osv. Ang. piggtråd, så er et ikkje lov å sette opp ny piggtråd, og piggtråd strekt opp etter 1. januar 2010 vil bli kravd fjerna. Det er mange som i dag skiftar ut piggtråd/bølgjetråd med toppbord.